Hernaðaryfirvöld í Írak halda því fram að hið svokallaða Íslamska ríki (IS) heyri nú sögunni til eftir að sérsveitir þeirra hafa nú náð undir sig staðnum þar sem Al-Nuri moskan stóð í borginni Mosul í Írak.

Milljónaborgin Mosul hefur verið eitt helsta víghreiður IS-liða eftir að leiðtogi hryðjuverkasamtakanna lýsti því yfir upp á dag fyrir þremur árum síðan að nýtt kalífadæmi múslima hefði nú verið stofnað á landssvæðum sem heyrðu undir Sýrland og Írak.

Hann væri hinn nýji forystumaður allra múslima í heimi. Það var 29. júní 2014 að al-Baghdadi lýsti þessu yfir í tilkynningu sem var lögð út á Twitter.

Nokkrum dögum síðar, þann 4. júlí, lýsti al-Baghdadi því yfir úr prédikunarstól Al-Nuri moskunnar að hann væri kalífi og þar með hinn nýji forystumaður allra múslima í heimi.

Þann 21. júní síðastliðinn var þessi rúmlega 800 ára gamla moska svo sprengd í tætlur af liðsmönnum IS þegar sýnt var að þeir væru að missa Mosul-borg og moskuna úr höndum sínum eftir heiftarlega bardaga gegn aðsteðjandi herliði.

Bygging Al-Nuri moskunnar hófst 1172, sama ár og Flateyjarklaustur var stofnað á Flatey á Breiðafirði. Það varð síðar Helgafellsklaustur við Stykkishólm á Snæfellsnesi og er löngu horfið í dag. Al-Nuri moskan með sinn sérstaka skakka turn stóð hins vegar þar til á miðvikudag fyrir rétt rúmri viku. Hún var á heimsminjaskrá UNESCO.

Nú er talið að það sé einungis spurning um nokkra daga þar til IS-liðar hafi endanlega lotið í lægra haldi í Mosul. Á sama tíma eru hryðjuverkasveitirnar orðnar mjög aðþrengdar í Sýrlandi þar sem Raqqa-borg er höfuðvígið. Þar hafa kúrdískir uppreisnarmenn umkringt borgina með aðstoð fjölþjóða liðsafla sem berst gegn IS.

Margt bendir því til að hið svokallaða kalífadæmi Íslamska ríkisins sé að líða undir lok.