Japanir ætla að senda stærsta herskip sitt, tundurspillinn Izumo, í þriggja mánaða úthald í Suður-Kínahafi. Skipið á að fara framhjá Taívan, Malasíu, Víetnam og Filippseyjum en tekur einnig þátt í heræfingum með bandarískri flotadeild sem er á svæðinu. Hætt er við að þetta muni auka á spennuna á milli Kína og Japan vegna deilna um yfirráð í Kínahafi.

Kínverjar gera kröfu til yfirráða yfir stærstum hluta Suður-Kínahafs og hafa meðal annars byggt nokkrar eyjar sem þeir geta notað ef til hernaðarátaka kemur við ríki eins og Víetnam og Taívan en þau gera einnig kröfu um yfirráð á svæðinu og njóta stuðnings Bandaríkjanna. Á gervieyjunum eru meðal annars lendingapallar fyrir þyrlur og eldflaugaskotpallar ef miða má við gervihnattamyndir.

Japanir gera ekki kröfu um yfirráð á hafsvæðinu en standa í deilum við Kína vegna yfirráða yfir hafsvæði í austanverðu Kínahafi. Jótlandspósturinn hefur eftir Liselotte Odggard, sem sérhæfir sig í rannsóknum á öryggispólitík í Asíu, að margt sé líkt með þessum tveimur fyrrgreindum deilum.

Hún segir að ef Japan sendi herskip í Suður-Kínahaf þá megi líta á það sem meira en bara samúðaryfirlýsingu með þeim þjóðum sem deila við Kína um yfirráð á hafsvæðinu. Hún segir að Kínverjar muni örugglega líta á þetta sem mikla ögrun og að þetta muni hafa í för með sér aukna hervæðingu þeirra á svæðinu.

Hún segir að hvorug þjóðin vilji þó að til átaka komi og þá sérstaklega ekki Kína því stríð við Japan þýði stríð við Bandaríkin og kínverski herinn myndi að öllum líkindum ekki geta unnið slíkt stríð.