Vinna verður gegn háum raunvöxtum á Íslandi en ekki íslensku krónunni ef eyða á ójafnvæginu sem skapast með reglulegu millibili á Íslandi og leiðir til efnahagsáfalla. Endurskoðun peningastefnu Seðlabankans þarf að taka tillit til þess ef hún á að verða trúverðug. Þetta ssgir Sigurður Hannesson, framkvæmdastjóri hjá Kviku banka og fyrrverandi varaformaður framkvæmdahóps um losun hafta, í pistli sem hann ritar í Fréttablaðið í dag. Hann segir það ekki lögmál að raunvextir á Íslandi séu hærri en í nágrannalöndunum þó að sú hafi verið raunin lengi.

Þegar fjármagnshöft eru losuð þá er það markmið ríkisstjórnarinnar að endurskoða peningastefnuna. Segir Sigurður að breytt efnahagslandslag kalli á slíka endurskoðun, en ferðaþjónustan er nú orðin mikilvæg stoð í hagkerfinu og ein af ástæðum þess að krónan hefur styrkst umtalsvert:

Til að skapa stöðugleika þarf að styrkja umgjörð krónunnar, sem hefur í gegnum tíðina verið birtingarmynd óstöðugleika í efnahagslífinu en ekki ástæða hans,

segir Sigurður. Hugmyndin að baki hávaxtastefnu Seðlabankans sé að háir vextir slái á eftirspurn, sporni gegn verðbólgu og séu sparnaðarhvetjandi. Hins vegar laða háir vextir erlent fjármagn til landsins á meðan þeir letja landsmenn til erlendra fjárfestinga. Meginvextir Seðlabankans, vextir á sjö daga bundnum innlánum, eru nú 5%. Segir Sigurður að við þær aðstæður styrkist krónan og afkoma útflutningsgreina versnar:

Styrking krónunnar auðveldar Seðlabankanum tímabundið að ná markmiðum sínum um lága verðbólgu enda lækkar verð á innfluttum vörum með sterkri krónu. Hins vegar hafi hávaxtamyntir tilhneigingu til þess að styrkjast yfir lengri tímabil en veikjast svo skyndilega. Sigurður segir að dæmið snúist þá við og þá skjóti verðbólga upp kollinum með tilheyrandi skelli fyrir heimilin í landinu, sem eru að mestu leyti með verðtryggðar skuldir:

Ráðast þarf að rótum vandans. Þannig verður að vinna gegn háum raunvöxtum en ekki gjaldmiðlinum sjálfum til að eyða ójafnvæginu sem skapast með reglulegu millibili á Íslandi og leiðir til efnahagsáfalla. Endurskoðun peningastefnu þarf að taka tillit til þessa eigi hún að vera vera trúverðug.

Svo virðist sem víðtæk samstaða ríkji milli stjórnmálaflokka og Seðlabankans um nauðsyn þess að endurskoða peningastefnuna:

Hins vegar ríkir engin samstaða um málið efnislega þar sem sjónarmiðin eru allt frá því að aðhyllast upptöku annarrar myntar yfir í sjálfstæða peningastefnu með íslensku krónunni og allt þar á milli. Ef áfangastaðurinn liggur ekki fyrir missir ferðalagið marks.