Stjórnarandstæðingur einn spyr á Facebook hvort nú sé runninn upp dagur sem markar nýtt upphaf hjá ríkisstjórninni?

Það er vonlegt að spurt sé. Aðgerðaráætlun vegna losunar hafta fær góðar viðtökur. Hún virðist vera vel hugsuð og merkilegt er að þegar sé búið að semja við stóra kröfuhafa – án þess að nokkuð hafi spurst út um það fyrr en nú.

Það ætti að sýna að áætlunin byggir á raunsæi.

Það verður líka frábært ef hægt verður að nota fjárhæðir sem koma í hlut ríkisins til að lækka skuldir þess. Það breytir öllu fyrir fjárhaginn ef vaxtagreiðslur, sem hafa verið hræðilega háar – snarlækka.

Þá ættu að verða aflögu meiri peningar til að leggja í heilbrigðismál, velferð, menntun, rannsóknir. Einhverjum gæti lika dottið í hug að lækka skatta þegar fram líða stundir.

En, eins og bent hefur verið á, erum við tæplega að tala um haftalaust hagkerfi. Meðan við höfum íslensku krónuna verðum við líklega alltaf með höft í einhverri mynd. Krónan fékk að fljóta í smátíma á síðasta áratug og það endaði með skelfingu. Vandinn sem nú er verið að leysa úr stafar af hluta til af mikilli spákaupmennsku í kringum íslensku krónuna.

Þörfin á alvöru gjaldmiðli minnkar semsagt ekkert við þetta.