Í Kaliforníu hafa verið sett lög sem banna notkun plastpoka í verslunum. Bannið tekur gildi frá næsta ári. Áður hafa reyndar margar borgir í Kaliforníu bannað plastpoka.

Bannið þykir vera sigur fyrir umhverfisvernd og það hefur líka táknrænt gildi – þetta er aðeins upphafið, það þykir öruggt að fleiri ríki eiga eftir að fylgja í kjölfarið og að reynt verður að stemma stigu við útbreiðslu plasts í fleiri myndum.

Við vitum að plast er óþverri sem eyðist ekki í náttúrunni, en við notum samt plastpoka í ótæpilegu magni. Rogumst með fulla plastpoka úr Bónus og Krónunni. Skömmumst okkar frekar fyrir það. Fáar þjóðir jafn mikið undir umhverfisvernd og Íslendingar. Það er hryllilegt hvernig heimshöfin fyllast af plasti. Sjáið til dæmis þennan vef, Plastic Oceans.

Við færum létt með að minnka mikið notkun plastpota, plastflaskna og plastumbúða – ef vilji væri fyrir hendi. Það myndi einungis auka hróður okkar.

Í staðinn má benda á handhæga poka eins og þessa, Baggu. Þeir eru fisléttir, níðsterkir, taka ekkert pláss þegar þeir eru tómir en rúma mikið – og eru bara ferlega sniðugir. Fást til dæmis hjá Heilsu – og í Matarkistunni hjá Sigurveigu.