Eftir því sem olíulindir minnka, en eftirspurn eftir vökvanum dregst ekki saman, fara menn að teygja sig lengra eftir olíunni.

Fyrir skemmstu sá ég mynd um hryllilega vinnslu olíu úr sandi sem fer fram í Alberta í Kanada. Stór svæði hafa orðið mengun að bráð vegna þessa – tíðni krabbameins er óvenju mikil vegna þessa.

Um leið fara menn lengra og lengra út á haf í sókn eftir olíu. Umhverfisverndarsamtök vara við þessu. Það er sagt að næsta olíuævintýri – sem Íslendingar ætla að taka þátt í – verði í og í kringum Íshafið.

Þar eru aðstæður allar mjög erfiðar, dýpi mikið og veður válynd. Allir vita að þetta er hættuspil – það getur verið mjög erfitt að stöðva olíuslys á þessum slóðum – en fíknin í olíuna – og letin við að þróa aðra orkugjafa – lætur ekki að sér hæða.

Olíusandar í Kanada. Eftir því sem olíuverðið hækkar borgar þessi vinnsla sig betur – og einnig leit að olíu í Íshafinu og þar í kring. En fórnarkostnaðurinn getur verið skelfilegur.