Grínistinn Lizz Winstead dregur karlahópinn sem berst fyrir tilnefningu Repúblikana sundur og saman í háði.

Þarna er Newt Gingrich sem varð fyrir svo miklu álagi við að elska föðurland sitt að hann varð að halda framhjá konunni sinni. Hann spáir því að Bandaríkin verði veraldlegt guðlaust land – þar sem róttækir íslamistar deila og drottna.

Þarna er Rick Santorum sem er með homma á heilanum – áhugi frambjóðendanna á kynlífi, sérstaklega samkynhneigðra, er reyndar furðulega mikill. Santorum óttast líka getnaðarvarnir.

Rick Perry vill ekki heldur að samkynhneigðir fái að giftast eða að þeir séu í hernum. Hann er sköpunarsinni, telur rétt að kenna sköpunarkenninguna jafnhliða þróunarkenningunni.

Og svo er það Mitt Romney – sérstakur vinur stórfyrirtækjanna, Forbes 500, eins og Lizz Winstead orðar það. Hann er líklegastur til að verða frambjóðandinn gegn Obama vegna þess að hann virkar nánast frjálslyndur við hlið hinna.

En er það þó ekki. Romney virðist þó hafa ágæta hæfileika til að skipta um ham.