Levon Helm var trommuleikari og söngvari í hljómsveitinni The Band, einni merkustu rokksveit allra tíma. Hljómsveitarmeðlimir voru frá Kanada, nema Helm, hann var frá Arkansas. Tónninn sem The Band ræktaði var einstakur og sérlega amerískur – blanda af rokki og þjóðlagatónlist úr ýmsum áttum. Hljómsveitarmeðlimir léku á ýmis hljóðfæri, Helm spilaði á mandólín milli þess að hann söng og lamdi húðirnar. Hann var tenging þeirra við uppsprettur bandarískrar tónlistar í Suðurríkjunum.

Þeir eru nú þrír látnir úr The Band, Richard Manuel, Rick Danko og Levon Helm. Það var ólifnaðurinn í kringum rokkstjörnulífið sem felldi Manuel og Danko, en Helm var sterkari á svellinu. Banamein hans var krabbamein. Hann var 71 árs.

Levon Helm lék einnig í kvikmyndum eins og The Coal Miner´s Daughter og The Right Stuff – síðustu æviárin var hann mjög virkur og gaf út plötur sem falla undir þá skilgreiningu að vera americana, Dirt Farmer og Electric Farm. Báðar fengu Grammy verðlaun. Hann hélt tónlistarhátíð í hlöðunni heima hjá sér í Woodstock, svokölluð Midnight Rambles,  sagði þetta vera í anda næturskemmtana sem tíðkuðust í heimasveit hans þegar hann var strákur. Hann hafði fengið krabbamein í háls – sem tók sig aftur upp og dró hann til dauða – og röddin var veikari en áður. Tilfiningin var samt jafn ósvikin.

Hér er Levon Helm í mikilli sveiflu á Last Waltz tónleikum The Band árið 1976. Lagið er The Night They Drove Old Dixie Down. Þetta er einhver besta tónleikamynd sem hefur verið gerð, enda var leikstjórinn sjálfur Martin Scorsese.