Frétt á forsíðu Morgunblaðsins gefur til kynna hvernig ástandið verður í pólitíkinni næsta vetur – þegar líður að þingkosningum um vorið.

Vinstri grænir eru mjög farnir að ókyrrast vegna Evrópusambandsumsóknarinnar sem hefur kostað þá mikið fylgi. Aðildarviðræðurnar eru að dragast von úr viti, en stefnan var að ljúka þeim í tæka tíð fyrir kosningarnar. Það mun ekki takast. Samkvæmt fréttum er stefnt að því að opna stóru kaflana fyrir árslok, en ekki víst að það takist. Þess vegna eru Vinstri grænir farnir að þrýsta á um að það fáist einhverjar niðurstöður áður en þær renna upp.

Steingrímur J. Sigfússon segir í fréttinni að þrýsta þurfi á Evrópusambandið um að fara nú að opna lykilkaflana í viðræðunum, ekki síst sjávarútvegskaflann. Ögmundur Jónasson sagði í Silfri Egils um daginn að hann vildi að ferlinu yrði hraðað, og þótt því yrði ekki alveg lokið, ætti að greiða atkvæði um það fyrir kosningarnar.

Þetta sýnir vaxandi óþol VG gagnvart umsókninni og þetta mun lita stjórnarsamstarfið næsta vetur – það er mikil spurning hversu lengi Samfylkingunni tekst að halda óbreyttum kúrsi í viðræðunum við ESB.