Stærstu flokkarnir í Bretlandi sameinast nú um að ráðast að Nick Clegg, formanni Frjálslynda flokksins. Sagt er að spunalæknar Íhaldsins og Verkamannaflokksins séu að brýna kutana.

Ástæðan er sú að Clegg malaði þá Gordon Brown og David Cameron í sjónvarpskappræðum og fylgi Frjálslyndra stórjókst í kjölfarið.

Í nýrri skoðanakönnun er Íhaldsflokkurinn með 33 prósent, Frjálslyndir með 28 prósent og Verkamannaflokkurinn með 28 prósent.

Hermt er að Íhaldsmenn sjái eftir því að hafa hleypt Clegg jafnfætis hinum leiðtogunum í kappræðunum.

Clegg nýtur þess að Frjálslyndi flokkurinn hefur ekki komið að stjórn Bretlands í marga áratugi – á tíma þegar kjósendur hafa lítið álit á pólitíkusum. Þannig virkar flokkurinn and-kerfislegur, laus við þá spillingu og þau tengsl við auðmagnið sem einkenna stóru flokkana tvo.

Gordon Brown er þreyttur og veiklaður og David Cameron virkar eins og hann sé búinn til á auglýsingastofu.

Frjálslyndir hafa líka í röðum sínum einn vinsælasta stjórnmálamann í Bretlandi, heilagan Vince svokallaðan, Vince Cable, sérfræðing flokksins í efnahagsmálum, sem varaði ákaft við efnahagshruninu 2008 og nýtur geysilegrar virðingar.

Frjálslyndir sem eru að stofni til flokkur Gladstones og Lloyd-Georges, en hafa ekki verið í ríkisstjórn síðan í þjóðstjórninni sem sett var á laggirnar í heimstyrjöldinni síðari. Flokknum fór að hnigna við ris Verkamannaflokksins á árunum í kringum 1930. Nú er talinn möguleiki á að úrslit kosninganna verði ekki afdráttarlaus og að hugsanlega þyrfti að mynda samsteypustjórn þar sem Frjálslyndir tækju þátt.