Fyrrverandi eiginmaður rithöfundarins JK Rowling, Jorge Arantes, hefur gengist við að hafa beitt rithöfundinn ofbeldi á meðan á hjónabandi þeirra stóð. Nánar tilgreint viðurkenndi hann að hafa slegið hana utan undir en segist jafnframt ekki sjá eftir því. The Sun greinir frá.
JK Rowling er frægust fyrir bækur hennar um galdradrenginn Harry Potter en Rowling hefur verið áberandi í fréttum undanfarnar vikur eftir að hún lét ummæli falla sem þykja sýna fram á fordóma hennar gegn trans fólki.
Rowling steig fram eftir gagnrýnina og greindi frá því að hún væri þolandi heimilisofbeldis og að Jorge væri gerandi hennar.
Jorge hefur nú tjáð sig um ásakanirnar og viðurkennir að hann hafi slegið fyrrverandi konuna sína, en segist ekki sjá eftir því. Í samtali við The Sun segir hann: „Ég sló Joanne – en þetta var ekki viðvarandi ofbeldi. Ég sé ekki eftir því að hafa slegið hana. Ef hún heldur öðru fram, þá er það hennar mál. Það er ekki satt að ég hafi lamið hana.“
Jorge segir að um einangrað tilvik hafi verið að ræða. Hann hafi slegið hana þegar hún fór frá honum. „Já það er satt að ég hafi slegið hana, en ég beitti hana ekki viðvarandi ofbeldi“