Sjónvarpsmaðurinn Phillip Schofield kom út úr skápnum í mjög einlægri færslu á Instagram. Síðastliðin 27 ár hefur hann verið giftur Stephanie Lowe og eiga þau saman tvær dætur á fullorðinsaldri, Molly og Ruby. Phillip er einn umsjónamaður breska sjónvarpsþáttarins This Morning, ásamt Holly Willoughby.
„Þú veist aldrei hvað er í gangi í lífi einhvers, hvað fólk er að glíma við eða hvernig því líður. Þannig þið vitið ekki hvað hefur verið að angra mig síðustu ár. Með stuðningi eiginkonu minnar og dætra minna þá hef ég loksins sætt mig við þá staðreynd að ég sé samkynhneigður,“ segir hann.
Í morgun ræddi Phillip nánar um opinberun sína í This Morning með stuðningi Holly. Þú getur horft á myndskeiðið í grein The Sun um málið.
Phillip átti erfitt með að halda aftur tárunum.
„Þetta er erfitt en ekki eitthvað sem gerðist hratt. Ég hef þurft að glíma við þetta í ágætis tíma. Ég var kominn á það stig að ég sat hérna á hverjum degi og einhver frábær og hugrökk manneskja sat fyrir framan mig og ég hugsaði: „Ég verð að vera þessi manneskja.“ Eina sem þú getur gert í lífinu er að vera hreinskilinn við þig sjálfan. Ég var kominn á það stig að ég var ekki viss um að mér líkaði vel við mig sjálfan því ég var ekki hreinskilinn við mig sjálfan,“ segir hann.
Phillip þakkar eiginkonu sinni og dætrum sínum fyrir stuðninginn.