Mikið hefur verið skrafað um slæma stöðu knattspyrnukappans Gylfa Þórs Sigurðssonar hjá Everton og jafnvel velt upp að hann verði seldur í sumar. DV ákvað því að lesa í tarotspil Gylfa og athuga hvað framtíðin ber í skauti sér. Lesendum er bent á að þeir geta sjálfir dregið tarot á vef DV.
Fyrsta spilið sem kemur upp er Tunglið. Gylfi hefur það á tilfinningunni að hann ráði ekki við það erfiði sem framundan er og einkennist tilfinningalíf hans af ringulreið, jafnvel einmanaleika og ístöðuleysi. Gylfi ræður hins vegar við hvaða hindrun sem er og þarf að rífa sig upp úr vonleysinu og takast á við framtíðina – ekki láta bölmóð villa sér sýn. Hann þarf að horfa betur í kringum sig og læra að meta það sem hann hefur því framtíðin er afar björt.
Næst er það 6 mynt. Gylfi hefur þénað vel í atvinnumennsku en er langt frá því að vera nískur. Hann er örlátur á auðæfi sín og deilir eigin velgengni með sínum nánustu. Þegar kemur að fjölskyldunni ríkir mikið jafnvægi í lífi Gylfa og hann er ávallt hreinskilinn í samskiptum sínum. Innan skamms hlotnast honum aukinn sálarfriður og hagur hans vænkast enn frekar.
Loks er það 7 stafir. Gylfi er afar áræðinn og metnaðarfullur. Hann býr yfir kjarki og ástríðu sem gæti nánast flutt fjöll og dást margir að hæfileikum hans til að takast á við erfiðleika. Það virðist rétt sem spekingarnir segja – Gylfi er á leið frá Everton en verður boðaður í viðtal hjá öðru liði sem er stærra. Þar mun hann ná að nýta alla sína kosti til framfara og skína enn skærar.
