Hrund Scheving, heimsmeistari í ólympískum lyftingum, og eiginmaður hennar Haraldur Pétursson eru nýbúin að taka eldhúsið í gegn.
„Við fengum húsið afhent í desember 2018 og fluttum inn í febrúar 2019, ætli framkvæmdirnar hafi ekki tekið svona tvo mánuði fyrir okkur,“ segir Hrund.
„Við tókum niður einn vegg í eldhúsinu, sem var mjög þröngt, og þurftum þá að hækka loftið í leiðinni. Þannig þetta var ekki bara eldhúsið. En eldhúsinnréttingin sjálf var í rauninni bara minnsta mál. Það voru svona þrír eða fjórir dagar sem fóru í að mála hana og púsla henni aftur saman,“ segir Hrund.
Hrund og Haraldur notuðu sömu eldhúsinnréttingu, en skiptu út efri skápunum fyrir minni skápa og skiptu út höldunum.
Er eitthvað meira sem þið ætlið að gera í húsinu?
„Að hækka loftið var frekar stórt verkefni, þannig nei það er í rauninni bara að klára það sem við erum að gera. Okkur finnst voðalega gaman að nota það sem við eigum, við eigum húsgögn frá ömmum okkar og erum mikið að nota það sem okkur er gefið. Við höfum ekki keypt mikið nýtt inn í húsið,“ segir Hrund.
„Við áttum ekkert fullt af peningum þegar við fluttum þannig við ákváðum að kaupa ekki innréttingu og sjáum alls ekki eftir því. Fyrirkomulagið eins og það er núna er bara æði. Við erum mjög sátt með þetta,“ segir Hrund.
„Við erum ekki alveg búin. Við minnkuðum forstofuna og settum ísskápinn þar inn. En það kemur með tímanum.“
Sjáðu fleiri myndir af heimili Hrundar og Haralds hér að neðan.
