Jennifer Pamplona, 27 ára, hefur eytt um 60 milljónum króna í fegrunaraðgerðir í þeim tilgangi að líkjast raunveruleika- og samfélagsmiðlastjörnunni Kim Kardashian.
Hún hefur ákveðið að hætta að gangast undir hnífinn eftir að hafa fengið varafyllingar sem létu hana líta út fyrir að vera með „varir eins og fiskur“. Hún opnar sig um aðgerðirnar í viðtali við The Sun.
Jennifer hefur farið í yfir 20 fegrunaraðgerðir til að líkjast Kim Kardashian. Hún heldur því nú fram að hún sé fórnarlamb misheppnaðrar fegrunaraðgerðar.
Jennifer lét sprauta 3 ml af fyllingarefni í bæði efri og neðri varir sínar í síðasta mánuði. Hún segist hafa farið af stofunni með þá tilfinningu að hún væri eitthvað að bregðast illa við aðgerðinni.
„Það blæddi mikið og ég fann fyrir miklum sársauka. Þegar ég sá útkommuna gat ég ekki trúað því – það var búið að klúðra þeim gjörsamlega og ég var skilin eftir með varir eins og fiskur,“ segir hún við The Sun.
Tveimur dögum eftir aðgerðina fór Jennifer aftur á stofuna og lét fjarlægja varafyllingarnar, sem kostuðu hana rúmlega 370 þúsund krónur. Hún segist ætla að halda sig frá fegrunaraðgerðum héðan í frá.
„Ég eyddi þessum tveimur dögum í felum heima hjá mér. Í hvert skipti sem ég sá andlit mitt byrjaði ég að gráta aftur,“ segir Jennifer.
„Núna líta varirnar mínar út fyrir að vera varir eldri borgara. Þær eru teygðar og líta út eins og loftlaus blaðra. Ég hef klárlega lært mína lexíu. Ég hef næstum því eyðilagt andlit mitt og heilsu mína því ég er háð fegrunaraðgerðum. Þegar ég lét fjarlægja allt fyllingarefnið lærði ég lexíu – ég ætla aldrei að fara í aðgerð til að laga eitthvað sem er þegar gott. Ég vildi alltaf meira og meira og ég eyðilagði næstum því andlit mitt og heilsu mína til að ná fullkomnun. Ég vil að saga mín verði góð dæmisaga fyrir allar þær stelpur sem vilja „stórar varir,“ þetta er ekki fallegt, alls ekki.“
Jennifer hefur gengist ótal mörgum sinnum undir hnífinn og hefur meðal annars farið í brjóstastækkun, rassastækkun, látið fjarlægja fjögur rifbein, farið í nefaðgerð, fitusog, fengið sér fyllingu í kinnarnar og látið sprauta fitu í lærin.
„Eftir að ég læt fjarlægja fyllingarefnið úr vörum mínum leið mér eins og ég hafi farið í sturtu. Ég var hrein aftur. Allt þetta var eins og martröð, en ég er ánægð að ég lærði mína lexíu,“ segir hún.