T.I. er bandarískur rappari og er búinn að gera allt brjálað eftir að hann viðurkenndi að hann fer með 18 ára dóttur sína árlega til kvensjúkdómalæknis til að athuga hvort meyjarhaftið sé enn til staðar.
Á Vísindavefnum stendur eftirfarandi um meyjarhaft:
„Masters, Johnson og Kolodny (1982) halda því fram að meyjarhaftið (hymen) gegni engu sérstöku hlutverki. Hins vegar hafi það í tímans rás verið konum mikilvægt að geta fært sönnur á meydóm sinn með óspjölluðu meyjarhafti. Segja má að hlutverk meyjarhaftsins í því samhengi sé að veita fyrirstöðu við fyrstu samfarir.“
Rapparinn sagði frá þessu í hlaðvarpsþættinum Ladies Like Us sem kom út á þriðjudaginn síðastliðinn.
T.I., sem heitir Clifford Harris Jr., sagði frá því hvernig hann tekur 18 ára dóttur sína Deyjah Harris árlega til kvensjúkdómalæknis til að „skoða meyjarhaftið“ og athuga hvort „það sé enn heilt.“
Hann sagði að læknirinn hafi sagt honum að meyjarhaftið getur rifnað við alls konar aðstæður, ekki aðeins kynlíf.
„En ég segi: Hey læknir, hún fer ekki á hestbak, hún hjólar ekki, hún spilar ekki íþróttir. Gaur, bara tékkaðu á meyjarhaftinu og komdu til baka með niðurstöðurnar,“ sagði rapparinn.
NBC News greinir frá því að rapparinn hafi gefið í skyn að dóttir hans hafi leyft lækninum að deila upplýsingunum með honum. En hlustendur þáttarins voru allt annað en sáttir og vakti þátturinn hörð viðbrögð.
Sumir einblíndu á orðaval T.I. og hvernig hann hljómaði eins og dóttir hans væri eign hans. Hegðun hans hefur verið lýst sem „ógeðslegri, stjórnsamlegri og óhugnanlegri.“
Hvað segja lesendur, er þetta of langt gengið?
