Þegar Brandi Lee komst að því að eiginmaður hennar hafði haldið fram hjá henni kom fátt annað til greina en að sækja um skilnað. Í ofanálag hafði eiginmaðurinn sofið hjá eiginkonu besta vinar síns.
Þegar skilnaðurinn fór fyrir dómstóla var Brandi gert að greiða eiginmanninum fyrrverandi upphæð sem samsvarar 930 þúsund krónum. Var þetta hluti af uppgjöri milli þeirra hjóna og eitthvað sem Brandi átti erfitt með að sætta sig við.
„Þetta er samkvæmt dómsúrskurði og ég verð að borga honum,“ segir Brandi í færslu á Facebook sem vakið hefur mikla athygli.
Í frétt Mirror kemur fram að Brandi hafi farið í bankann og óskað eftir því að taka út peninginn, 930 þúsund krónur, í klinki – nánar tiltekið í 10 senta peningum. Ekki var um neitt smá magn að ræða eins og sést á meðfylgjandi myndum.
Alls var um að ræða tíu stóra kassa sem vógu samtals um 160 kíló og nokkrar fötur til viðbótar.