Jake Patricio var orðinn 160 kíló þegar hann sagði hingað og ekki lengra og ákvað að taka lífsstíl sinn í gegn. Jake hafði verið virkur í íþróttum á sínum yngri árum, en þegar hann fór á vinnumarkaðinn átti hann erfiðara með að finna sér tíma til að hreyfa sig – kunnuglegt stef hugsa eflaust sumir.

Jake segir sögu sína á lífsstílsvefnum Men‘s Health en þar kemur fram að hann hafi gert tvær grundvallarbreytingar á lífi sínu; tók upp ketómataræðið og reglubundna föstu. Þessar breytingar gerðu það að verkum að hann er nú 50 kílóum léttari.

Jake var í vinnunni þegar hann ákvað að breyta lífi sínu til frambúðar. Hann hafði tekið eftir því hvað hann átti orðið erfitt með að ganga upp stiga en þegar hann steig á vigt, sem notuð er til að vigta vörubretti á vinnustað hans, fékk hann áfall. „Ég var reiður út í sjálfan mig fyrir að koma mér í þessar aðstæður.“

En hvernig fór Jake að því að breyta lífi sínu til hins betra?

Fyrsta skrefið var að taka upp ketómataræðið sem hefur verið mjög vinsælt að undanförnu. Þeir sem eru á ketó neyta nær engra kolvetna og það gerði Jake. Hann borðaði bara morgunmat, hádegismat og kvöldverð til að byrja með en leyfði sér prótíndrykki eftir æfingar.

Næsta skref var að taka upp reglubundnar föstur. Fyrstu máltíð dagsins borðaði hann í hádeginu og þá næstu klukkan hálf sex síðdegis. Hann hélt sig áfram við kolvetnasnautt mataræði og borðaði aðeins þessar tvær máltíðir yfir daginn. Þriðja skrefið var að takmarka hitaeiningainntökuna við 1.800 hitaeiningar á dag, sex daga vikunnar. Hann leyfði sér að innbyrða 2.500 hitaeiningar einn dag í viku en hélt sig, eftir sem áður, við kolvetnasnautt mataræði.

Samhliða þessum breytingum byrjaði hann einnig að hreyfa sig hægt og rólega. Hann fór í ræktina þrjá daga vikunnar þar sem hann lyfti lóðum. Í lok hverrar æfingar hljóp hann tæpa tvo kílómetra á hlaupabretti.

Jake var fljótur að sjá árangur og sem fyrr segir eru 50 kíló fokin út í veður og vind síðan hann byrjaði lífstílsbreytinguna. Hann viðurkennir að þetta hafi ekki alltaf verið auðvelt.

„Það komu dagar þar sem mig langaði bara að leggjast upp í rúm eftir vinnu og sofa. Það komu líka kvöld þar sem ég fór svangur í háttinn. Það sem hélt mér gangandi var sú hugsun að ég myndi aðeins sjá árangur ef ég héldi mig við mín markmið.“

Jake segist ekki hafa haft neitt sérstakt þyngdarmarkmið í huga þegar hann byrjaði. Það eina sem hann vildi var að komast í betra form. „Mér líður töluvert betur núna. Ég er ekki eins þreyttur og ég var og ég er sterkari en áður. En ég er ekki hættur.“