Söngkonan Britney Spears rýfur þögnina um sitt andlega ástand og það sem fólk er að slúðra um hana í nýju myndbandi á Instagram. Britney hefur ekki átt sjö dagana sæla síðustu vikur. Faðir hennar, James Spears, gekkst nýverið undir skurðaðgerð vegna rifins ristils. Í kjölfarið tók Britney sér hlé frá tónleikaröð sinni í Las Vegas og leitaði sér hjálpar á geðheilbrigðisstofnun vegna andlegs álags sem hefur fylgt veikindum föður hennar.
Sjá einnig: Hæðir og lægðir Britney Spears – Brotnaði niður á rakarastofu – Lögð inn á geðdeild: „Ég var skíthrædd“
Í myndbandinu vill hún ítreka að það sé í lagi með sig.
„Fjölskylda mín hefur verið undir miklu stressi og þjáist af miklum kvíða undanfarið þannig að ég þurfti tíma til að takast á við það. En ekki hafa áhyggjur, ég sný aftur fljótt,“ segir Britney í myndbandinu. Í texta fyrir neðan það útskýrir hún mál sitt frekar.
„Mig langaði að segja hæ því allt er orðið stjórnlaust!!! Vá!!!“ segir hún og vísar meðal annars í sögusagnir sem komið var á kreik um að henni væri haldið gegn vilja sínum inni á geðdeild. Þá segir hún að „fjölskyldu minni og teymi hefur verið hótað lífláti“.
Í færslunni minnist hún á fyrrverandi umboðsmann sinn og segir hann hafa skrifað lygar um hana í tölvupóstum.
„Ég er að reyna að taka frí fyrir mig en allt sem hefur gerst gerir það erfitt,“ segir hún. „Ekki trúa öllu sem þið lesið og heyrið. Þessir lygapóstar úti um allt voru skrifaðir af Sam Lutfi fyrir mörgum árum. Ég skrifaði þá ekki. Hann var að þykjast vera ég og hafði samskipti við teymið mitt.“
Þá stappar hún stálinu í fylgjendur sína og biður þá að hafa ekki áhyggjur.
„Aðstæður mínar eru einstakar en ég lofa að ég er að gera mitt besta. Þið vitið þetta kannski ekki um mig en ég er sterk og ég stend með sjálfri mér!“
