Fjölmiðlakonan Ragnhildur Steinunn Jónsdóttir, sem kjörin var ungfrú Ísland árið 2003, og kærasti hennar til margra ára, sálfræðingurinn Haukur Ingi Guðnason giftu sig á Ítalíu í gær.

Parið hefur verið saman síðan árið 1996 og eiga saman tvö börn.

„Við erum loksins hjón,“ skrifar Ragnhildur Steinunn í stöðufærslu á Facebook. „Áttum yndislega stund með vinum og ættingjum á Ítalíu. Dagurinn var svo sannarlega draumi líkastur!
Við eigum ekki orð yfir hversu frábært og skemmtilegt fólk er í kringum okkar. Plank, bónorð, brotið borð, verðurfræðingar og lögregla kom við sögu þennan dag. Uppskrift að einum besta degi lífs okkar! VÁ. Elsku vinir hjartans þakkir fyrir að njóta dagsins með okkur og gera þetta að ógleymanlegri stund.“

Íris Dögg Einarsdóttir sá um að fanga brúðkaupið í gullfallegum myndum, Sigrún Ósk Kristjánsdóttir var veislustjóri, Elín Reynisdóttir sá um förðun brúðarinnar og Guðni Már Harðarson prestur gaf brúðhjónin saman.