Aðili sem þekkir til fjölskyldu áttræðs manns í Garðabæ sem lést á föstudag segir samband dóttur mannsins við foreldra sína hafa verið stormasamt. Hafi það einkennst af yfirgangi dótturinnar, sem er 28 ára, við foreldra sína. Konan er í gæsluvarðhaldi og er grunuð um að hafa veitt báðum foreldrum sínum áverka, skv. frétt RÚV. Samkvæmt frétt Vísis fékk maðurinn hjartaáfall en niðurstöður krufningar liggja ekki fyrir.

Lögreglan á höfuðborgarsvæðinu verst allra frétta af rannsókn málsins en segir málið vera flókið og viðkvæmt. Gæsluvarðhald yfir konunni rennur út á morgun en óvíst er á þessari stundu hvort það verður framlengt.

Heimildarmaður DV segir manninn og fjölskyldu hans vera stórefnaða en fjölskyldan býr í afar stóru einbýlishúsi í Garðabæ. Segir heimildarmaður einnig að unga konan hafi ekki verið í föstu starfi en hún hafi lokið stúdentsprófi frá Verslunarskólanum fyrir mörgum árum. Hún er þekkt í heimi hestamennsku og hefur keppt með góðum árangri í tölti. Hestaeign konunnar er ríkuleg en faðir hennar gaf henni meðal annars tíu milljóna króna graðhest. Ennfremur upplýsir sami aðili að heimili fjölskyldunnar í Garðabæ sé mjög ríkmannlegt og stúlkuna hafi aldrei skort neitt af efnislegum gæðum heldur öðru nær.

Hinn látni starfaði sem tannsmiður og var á meðal hinna fyrstu í þeirri grein hér á landi.

Heimildarmaður segir hina grunuðu vera vinafáan einfara og hún hafi ekki myndað sterk tengsl við fólk í hestamennsku þrátt fyrir að vera mjög atkvæðamikil á því sviði. Ennfremur lætur hann þess getið að hún hafi aldrei verið bendluð við neyslu fíkniefna og fjölskyldan er ekki talin hafa nein tengsl við undirheima.

Móðir stúlkunnar var 43 ára gömul er hún fæddi hana og faðirinn, sem var áttræður er hann lést, var kominn yfir fimmtugt. Stúlkan er eina barn foreldra sinna en hinn látni lætur einnig eftir sig son frá fyrra sambandi.

Fréttin hefur verið uppfærð