Þegar börn og unglingar byrja að reykja verða óafturkræfar breytingar í líkamanum sem senda að sögn vísindamanns líkamann „eftir hraðbraut í átt til hörmunga“.
Það voru finnskir vísindamenn sem gerðu rannsóknina. Niðurstöður hennar eru meðal annars að reykingar á barns- og unglingsaldri hafi mun skjótari áhrif á uppbyggingu hjartans og virkni þess en áður var talið.
Strax á miðjum þrítugsaldri hafa reykingar haft varanleg áhrif á líkamann. Hjarta ungs reykingafólks stækkar óeðlilega mikið og virkni þess er ekki eins góð og hjá jafnöldrum.
Finnsku vísindamennirnir studdust við stóra breska rannsókn „The Avon Longitudinal Study of Parents and Children“ þar sem fylgst er með 15.000 manns sem fæddust í upphafi tíunda áratugarins.
Þátttakendurnir voru spurðir um mataræði, lífsstíl og reykingar. 2.000 þeirra fóru í hjartamyndatöku þegar þeir urðu 24 ára. Hjarta tæplega helmings þeirra hafði breyst vegna áhrifa reykinga.
Andrew Agbaej, læknir og prófessor við Austfinnska háskólann og einn höfunda rannsóknarinnar, sagði þetta vera vandamál fyrir fólkið: „Hjartað byrjar að dæla blóði miklu hraðar en það eykur hraða púlsins. En af því að blóðið streymir hraðar, þá hækkar blóðþrýstingurinn. Þetta verður vond hringrás þar sem hjartað heldur áfram að stækka, púlsinn slær hraðar og þetta fer úr böndunum. Ungt reykingafólk er á hraðbraut í átt að hörmungum.“
