Myndir sem Volodomír Selenskí Úkraínuforseti afhenti Donald Trump á margumtöluðum fundi þeirra í lok febrúar, þar sem allt fór í bál og brand, eru sagðar hafa vakið óánægju hjá Bandaríkjaforseta og stuðlað að því að fundur þeirra fór í bál og brand.

Selenskí hitti Trump og varaforsetann J.D. Vance fyrir skemmstu eins og frægt er orðið og voru samskiptin býsna köld þar sem Trump og Vance sökuðu Úkraínuforseta um vanþakklæti og virðingarleysi.

Selenskí mætti til fundarins með belti hnefaleikamannsins Oleksandr Usyk í farteskinu, en hann er heimsmeistari í þungavigt. Hugðist hann gefa Trump beltið.

Hann virðist hafa skipt um skoðun á síðustu stundu því í byrjun fundarins dró hann upp myndir af úkraínskum stríðsföngum sem hann sýndi Trump þegar myndavélarnar byrjuðu að rúlla og fundurinn byrjaði. Um var að ræða úkraínska hermenn sem höfðu verið í haldi Rússa og báru merki þess að hafa sætt pyntingum.

„Það er erfitt að horfa á þetta,“ sagði Trump þegar hann skoðaði myndirnar.

Ónafngreindur heimildarmaður innan bandaríska stjórnkerfisins segir við Time að þessi ákvörðun hafi hleypt illu blóði í Trump. Bandaríkjaforseta hafi liðið eins og Selenskí væri að kenna honum um þá slæmu meðferð sem hermennirnir máttu sæta.

Í viðtali við Time segir Selenskí að hann sjái ekki eftir því að hafa sýnt Trump myndirnar því hann hafi viljað höfða til mennsku hans. „Hann á fjölskyldu, ástvin og börn,“ sagði Selenskí meðal annars og bætti við að hann hafi viljað sýna honum gildi sín. „En svo fór samtalið í aðra átt,“ bætti hann við.