Andri Snær Magnason, rithöfundur og fyrrverandi forsetaframbjóðandi, segir farir sínar ekki sléttar eftir að hann fletti nafninu sínu upp í gagnagrunni sem aðgengilegur er á vef fréttamiðilsins The Atlantic.

Fréttamiðillinn hefur fjallað um notkun Meta, móðurfélags Facebook, á Library Genesis (LibGen) til að þjálfa gervigreindarlíkön sín.

Birti miðillinn á dögunum umfjöllun sem varpaði ljósi á umfang málsins og gerði lesendum einnig kleift að slá inn nöfn rithöfunda og hvaða verk eftir þá hafa verið notuð. Birti hann skjáskot af sínum niðurstöðum máli sínu til stuðnings og sagði:

„Hér sést að META þessi síða hér – hefur stolið að minnsta kosti tíu bókum frá mér til að þjálfa gervigreindarmódelið mitt. Þau notuðu sjóræningjasíðu og tróðu bókunum inn í svartholið sitt. Ef þið hittið Mark Z megið þið gjarnan ræna hverju sem er frá honum. Húfu, brimbretti, kóða. Ykkar er valið. Nei djók – það væri í alvöru ráð fyrir útgefendur heimsins að senda honum reikning upp á milljarð dollara. Já og írónían að skrifa þetta hér frítt,“ sagði Andri Snær.

Blaðamaður sló að gamni inn fleiri íslenskum rithöfundum og má til dæmis sjá að verk eftir höfunda á borð við Halldór Laxness, Arnald Indriðason og Yrsu Sigurðardóttur hafa einnig ratað þangað inn.

Færsla Andra Snæs vakti talsverða athygli og lögðu margir orð í belg undir henni. „Andstyggð,“ sagði til dæmis Egill Helgason fjölmiðlamaður.