Alls voru átta handtekin í gær, sjö karlar og ein kona, í tengslum við andlát manns sem fannst þungt haldinn í Gufunesi í gærmorgun. Maðurinn lést stuttu síðar á sjúkrahúsi en á honum voru áverkar sem benda til þess að hann hafi þolað miklar barsmíðar, spörk og tröðkun.

Maðurinn var á sjötugsaldri og var frá Þorlákshöfn.

Sjá einnig: Hinn látni var karlmaður á sjötugsaldri – Líkið fannst í Gufunesi

Þremur sem handteknir voru í gær var sleppt í dag. Aðrir þrír eru síðan taldir vera höfuðpaurar í málinu. Reynt var að þvinga manninn til að millifæra þrjár milljónir króna en hann neitaði því. Var honum þá misþyrmt.

Bíll sem lögregla hefur haldlagt er núna til rannsóknar, hann er rannsakaður gaumgæfilega að innan og tekinn í sundur.

Samkvæmt heimildum DV má búast við því að gæsluvarðhaldsúrskurðir verði kveðnir upp í málinu við Héraðsdóm Suðurlands eftir hádegi í dag.