Eins og alþjóð veit bar Guðrún Hafsteinsdóttir sigur úr býtum í formannskjöri Sjálfstæðisflokksins um nýliðna helgi. Slagurinn við mótframbjóðandann, Áslaugu Örnu Sigurbjörnsdóttur, var afar jafn og að endingu skyldu aðeins 19 atkvæði á milli frambjóðendanna. Í raun var sigurinn enn naumari því ef Guðrún hefði misst tvö atkvæði þá hefði hún ekki náð yfir 50% atkvæða sem hefði þýtt að boðað hefði verið til annarrar umferðar í formannskjörinu.

Andrés Magnússon, blaðamaður Morgunblaðsins, gerði það að umtalsefni í pistli í blaðinu í dag að þá hefði verið óvíst um niðurstöðuna því allmargir landsfundargestir höfðu yfirgefið Laugardalshöllina eftir að hafa greitt atkvæði og biðu ekki eftir niðurstöðunni.

Komu að lokuðum dyrum

Andrés studdi Áslaugu Örnu með ráðum og dáð eins og kollegi hans á Morgunblaðinu, Stefán Einar Stefánsson, umsjónarmanns viðtalsþáttarins eldfima Spursmál.

Munurinn milli Guðrúnar og Áslaugar Örnu hefði getað verið enn minni því Stefán Einar varð fyrir því óláni að mæta of seint í Laugardalshöll á sunnudeginum og fékk því ekki að greiða atkvæði eins og aðrir landsfundargestir. Til þess að fá kjörseðil í hendurnar þurftu gestir að vera mættir kl.11.30 en Stefán Einar mætti örstuttu síðar og kom að lokuðum dyrum. Samkvæmt heimildum DV varð blaðamaðurinn skeleggi allt annað en sáttur við þessa formfestu og ósveigjanleika en varð síðan að bíta í það súra epli að fylgjast með formannskjörinu án þess að fá að greiða atkvæði.

Sömu örlög hlaut Orri Hauksson, fyrrverandi forstjóri Símans, sem var eindreginn stuðningsmaður Áslaugar Örnu og opnaði meðal annars fundinn þar sem hún tilkynnti um formannsframboð sitt með glæsibrag.

Munurinn hefði því getað orðið sautján atkvæði en ljóst er að eftir þessa naumu kosningu mun hið forkveðna, hvert atkvæði skiptir máli, óma í hugum Sjálfstæðismanna, sem sækjast eftir vegtyllum, um ókomna tíð.