Candice Aþena Jónsdóttir er trans kona á þrítugsaldri sem hefur undanfarna mánuði mátt þola miklar ofsóknir. Fimm sinnum frá því rétt fyrir jóli hefur gluggarúða á heimili hennar verið brotin, fyrrverandi vinur hennar rifbeinsbraut hana fyrir skömmu og hún hefur ítrekið verið borin sökum á netinu sem hún segir upplognar.
Ásakanirnar felast í því að Candice Aþena hafi gerst sek um kynferðislega áreitni við börn. Hún segir þær ásakanir vera gjörsamlega fráleitar enda hafi ekki verið lögð fram nein gögn um slíka háttsemi.
Árið 2023 komst í hámæli áreiti annarrar trans konu við börn og unglinga og voru birt skjáskot af viðreynslu hennar við 12 og 13 ára stúlkur sem hún bauð á „deit“. En það er allt önnur kona.
Candice Aþena segir að sumir rugli henni saman við þessa konu en hjá öðrum snúist þetta um fordóma sem felist í því að setja allt trans fólk undir sama hatt. Þannig hafi framferði hinnar konunnar ýtt undir sögusagnir um að saklaust trans fólk sýni af sér sömu hegðun. „Sumt fólk virðist halda að allir trans séu svona,“ segir hún.
„Þetta byrjaði á því að gömul vinkona mín sem var reið út í mig bjó til þessar sögusagnir og dreifði á Beautytips,“ segir hún enn fremur. Þó að áskanirnar hafi ekki verið mjög áberandi hafa þær verið lífseigar og kallað fram ofbeldishegðun. Fyrir tveimur vikum réðst fyrrverandi vinur Candice Aþenu á hana og rifbeinsbraut hana (hún hefur sýnt DV áverkavottorð um þetta frá bráðamóttökunni). „Hann sagðist hafa heyrt að ég hefði gert þetta en hann ætti að vita betur, hefur þekkt mig í mörg ár og á að vita að ég geri ekki svona.“
„Þetta sem önnur trans kona hefur gert, það eru til sannanir um það og staðfest að hún hefur stundað þetta. Sem mér finnst bæði ógeðslegt og óskiljanlegt. En það hefur ekkert með mig að gera og það er ömurlegt ef framkoma einnar manneskju kallar fram hatur gegn öllu trans fólki. Ég legg áherslu á kærleika í mínu lífi og að vera til staðar fyrir fólkið mitt. Ég er baráttukona með kærleika að leiðarljósi og ég vil berjast fyrir mannréttindum trans fólks og alls LBGT-fólks.“
Sem von er hafa ofsóknirnar tekin mikinn toll af Candice Aþenu. „Ég er mjög langt niðri út af þessu og ofboðslega reið, en ég trúi á kærleikann. Mig langar að taka þesssar hræðilega ljótu ásakanir og umbreyta þeim í kærleika á einhvern hátt,“ segir hún.
