Arndís Anna Kristínardóttir Gunnarsdóttir, fyrrum þingmaður Pírata, hefur ákveðið að bjóða sig fram til formanns lífsskoðunarfélagsins Siðmenntar. Hún segir hvatann að framboðinu sínu fyrst og fremst stöðu mennsku og mannréttinda í heiminum.

Hún greinir frá ákvörðun sinni á Facebook þar sem hún skrifar:

Hvatinn að framboði mínu til formanns Siðmenntar nú er fyrst og fremst staða mennsku og mannréttinda í heiminum, vaxandi ásókn andhúmanískra afla, aukin sundrung, útskúfun og afmennskun, sem að mínu mati kallar á styrkari samstöðu okkar sem trúum á manneskjuna og hið mennska, okkar sem höfum húmaníska hugsjón.

Lykillinn að friði og frelsi fólks eru mannréttindi. Ein mikilvægustu mannréttindin okkar er frelsið til að hugsa og til að mynda okkur skoðun, frelsið til að trúa því sem gefur lífinu okkar gildi: Hugsana-, skoðana- og trúfrelsið. En öll spila þau saman, mannréttindin, og trúfrelsið er lítils virði án tjáningarfrelsisins, frelsis okkar til að koma saman, til að sameinast um gildin okkar, og frelsisins til að eiga samtal um þau.

Staða mennskunnar í heiminum kallar að mínu mati á virkara samtal á milli ólíkra aðila um það sem gerir okkur að manneskjum og þau gildi sem það kallar á. Ég held að lykillinn að því að stöðva þessa þróun og snúa henni við, sé að við sem eigum þessi gildi sameiginleg, tökum höndum saman. Það sem ég myndi vilja gera sem formaður Siðmenntar væri að setja kraft í að byggja brýr á milli ólíkra lífsskoðunarfélaga og sameinast um það sem við eigum sameiginlegt, því af því stafar ógnin.“

Arndís rekur að hún sé lögfræðingur að mennt með sérhæfingu í mannréttindum. Hún hefur eins unnið hjá Rauða krossinum þar sem hún veitti hælisleitendum og flóttafólki lögfræðilega aðstoð. Hún hefur eins unnið á Barnaverndarstofu, í ráðuneytum og svo sem þingmaður Pírata.