Stjórn stéttarfélagsins umdeilda, Virðingar, hefur nú sent frá sér yfirlýsingu en til þessa hefur lítið heyrst frá félaginu frá því að Efling hóf að gagnrýna kjarasamning sem Virðing gerði við Samtök félaga á veitingamarkaði (SVEIT).
Virðing mótmælir fullyrðingum Eflingar um félagið og segir þær ósannar. „Virðing stéttarfélag er stofnað af starfsmönnum í veitingahúsum. Þeir félagsmenn Virðingar sem stofnuðu félagið höfðu það frelsi að mega stofna sitt eigið stéttarfélag. Stjórn Eflingar og formanni þess kemur það þess vegna ekkert við þó að þetta fólk vilji frekar stofna sitt eigið stéttarfélag og vilji ekki vera í Eflingu. Þá hefur Efling heldur engan einkarétt á því að semja við vinnuveitendur eða fyrir hönd þeirra sem hjá þeim vinna.“
Efling hafi sýnt í verki að félagið hafi engan áhuga á að semja við SVEIT. Sá kjarasamningur sem Efling hefur gagnrýnt sé gerður af fúsum og frjálsum vilja undir formerkjum félagafrelsis sem sé stjórnarskrárvarinn. Hann veiti í sumum atriðum betri kjör en kjarasamningur Eflingar, þó svo í sumum tilvikum sé hann lakari.
Stjórn Virðingar frábiður sér að vera bendluð við lögbrot og ítrekar að félagsmenn hafa og eiga rétt til að stofna stéttarfélög og gera þá samninga sem þeir eru tilbúnir að vinna eftir.
Umdeildustu ákvæði kjarasamningsins varða dagvinnutímabil en samkvæmt samningi Virðingar og SVEIT telst dagvinnutímabil vera tíminn frá 08:00-20:00 virka daga og 08:00-16:00 á laugardögum. Eftir 8 tíma vinnu á dagvinnutímabili skal koma til álagsgreiðslna. Vinnutími fyrir fulla dagvinnu er 173,33 að meðaltali yfir þriggja mánaða tímabil.
Samkvæmt samningi Eflingar og Samtaka atvinnulífsins er dagvinna frá 07:55-17:99 mánudaga til föstudaga eða frá 07:30-16:35.
Hjá Virðingu er greitt með eftirfarandi hætti fyrir vinnu utan dagvinnutímabils:
Hjá Eflingu er það:
Séu einungis staðnar vaktir á tímabilinu frá 16:00-08:00 svo og á laugar- og sunnudögum skal greiða jafnaðarálag sem nemur 42% á unna stund.
Eins hefur Efling gagnrýnt eigna- og fjölskyldutengsl milli SVEIT og Virðingar.
Sjá einnig:
Nafntogaðir veitingamenn á meðal þeirra sem Efling hefur blásið í herlúðra gegn
Efling er ekki eina félagið sem hefur gagnrýnt kjarasamninginn. Meðal annars hefur Alþýðusamband Íslands tekið undir gagnrýnina og sagt nafngift Virðingar vera ósvífni. Ekki sé hægt að samþykkja að um stéttarfélag sé að ræða.
Virðing hefur til þessa haldið sig frá umræðunni. DV gekk á eftir framkvæmdastjóra Virðingar, Valdimar Leó Friðrikssyni, í desember en hann svaraði ekki ítrekuðum símtölum. Eins fengust engin svör í gegnum það netfang sem var gefið upp á heimasíðu félagsins. Því má segja að yfirlýsing félagsins í dag hafi rofið þögnina. Leiða má líkum að því að Virðing hafi sent frá sér yfirlýsinguna í dag til að bregðast við mótmælum Eflingar sem fóru fram í Kringlunni í hádeginu fyrir utan veitingastaðinn Finnson Bistro en Efling segist hafa heimildir fyrir því að starfsfólk þar hafi verið skráð í Virðingu.
Efling sendi frá sér tilkynningu eftir mótmælin þar sem ítrekað er að kjarasamningur Virðingar og SVEIT sé gervikjarasamningur sem brjóti gegn íslenskum lögum sem og alþjóðlegum reglum og tilskipunum. Þar sé verkafólk rænt samningsbundnum réttindum til að lækka laun þeirra. Efling tekur fram að mikill meirihluti veitingamanna sem Efling hefur haft samband við undanfarnar vikur hafi upplýst um að þeir muni fylgja kjarasamningi Eflingar og Samtaka atvinnulífsins. Skorar Efling á þá veitingamenn sem hafa ekki brugðist við áskorunum þeirra að gera það hið fyrsta.
