Þetta kemur fram í samantekt Sænska ríkisútvarpsins. Einnig kemur fram að færri hafi særst af völdum skotvopna á síðasta ári en árin á undan. 2022 særðust 110 en á síðasta ári særðist 61.
„Það eru líklega margir þættir sem valda þessari fækkun. Einn þeirra er að það eru einfaldlega miklu færri til að skjóta til bana.“ Þetta sagði Jan Lundbeck, tölfræðingur hjá sænska forvarnarráðinu.
Hann vísaði til þess að 2022 og 2023 háðu glæpagengin Foxtro og Dalen blóðugt stríð.
„Það eru færri til að skjóta, því það er búið að skjóta svo marga á síðustu árum,“ sagði Lundbeck og bætti við að margir þeirra, sem tóku þátt í átökunum, séu dánir, sitji í fangelsi eða hafi flúið land.
Blaðamaðurinn Diamant Salihu, sem hefur skrifað margar bækur um sænsk glæpagengi, tók í sama streng og bætti við að einnig sé minna um innri átök í Foxtrotglæpagenginu vegna þess hversu margir meðlima þess séu dánir og þess utan sitji margir í fangelsi.
Salihu benti einnig á að margir hafi verið dæmdir í fangelsi eftir að lögreglunni tókst að komast inn í dulkóðaðar skilaboðaþjónustur á borð við Anom, Encrochat og Sky ECC. Á grundvelli gagna, sem var aflað með því, voru mörg hundruð meðlimir glæpamenn dæmdir í fangelsi í Svíþjóð. Sænska ríkissjónvarpið segir að samtals hljóði dómarnir upp á 2.200 ára fangelsi.
Bæði Lundbeck og Salihu bentu einnig á að lögreglan nái nú betri árangri en áður. Hún sé betri í að koma í veg fyrir skotárásir og morð.
