Íslendingar borða mikinn graflax um hátíðirnar. Yfirleitt á ristuðu brauði með sérstakri graflaxsósu. En þó að margir setji vel af sósunni á fiskinn þá klárast hún sjaldnast á undan honum.

Þá kemur upp spurningin: Hvað á að gera við graflaxsósuna þegar graflaxinn er búinn?

Á tímum þar sem umræða um matarsóun, hækkandi verðlag og umhverfisvernd er í algleymi þá hlýtur að vera hægt að gera eitthvað við graflaxsósuna annað en að henda henni í ruslið. En sósan er að mestu samsett úr sinnepi, vatni, repjuolíu, hveiti, eggjarauðum, kryddum, ediki og sitthvoru fleiru.

Um þetta hafa skapast miklar umræður á Facebook-síðunni Matartips og gefa netverjar ýmis góð ráð um hvað skal gera við sósuna. Meðal annars að borða hana…:

– Með grilluðum laxi

–  Með síld

– Með reyktri bleikju

– Með öðrum fiski

– Á ristað brauð

– Á ristað brauð með osti

– Með harðsoðnum eggjum

– Með reyktum lunda

– Með rúllupylsu

– Á pylsu

– Með sviðasultu

– Dýfa laufabrauði í hana (tvær flugur í einu höggi þar)

– Út í heita brúna sósu

…….síðan er líka nefnt að þetta sé líka góð ástæða til þess að kaupa meiri graflax.