Faðir hefur verið dæmdur átta mánaða skilorðsbundið fangelsi fyrir að slá dóttur sína í andlit og sparka í búk hennar. Einnig að hóta henni og bróður hennar ofbeldi. Sagðist hann ætla að berja hana svo illa að hún gæti ekki andað fyrir blóði ef hún færi ekki inn í herbergið sitt.
Dómurinn féll í Landsrétti í fyrradag, 17. desember, og voru refsingarákvæði föðurins óröskuð. Einnig bótakröfur að mestu, það er að hann greiði dóttur sinni eina milljón króna og syni 400 þúsund krónur auk vaxta. Þá er honum einnig gert að greiða máls og áfrýjunarkostnað.
Ofbeldisbrotið sem faðirinn var dæmdur fyrir skeði á heimili þeirra þann 30. ágúst árið 2016. Sló hann dóttur sína í andlitið og elti hana síðan inn svefnherbergið og sparkaði í efri hluta búks hennar. Hlaut hún sprungna vör, roða og eymsli í kringum rifbein.
Hótanirnar sem hann var dæmdur fyrir gegn börnum sínum tveimur áttu sér stað þann 26. mars árið 2019. Hótaði hann dóttur sinni svo miklum barsmíðum að hún gæti ekki andað fyrir blóði ef hún færi ekki inn í herbergið sitt. Eftir það hótaði hann syni sínum barsmíðum líka.
Í ákærunni, sem var gefin út 1. nóvember árið 2022, sagði að hótanirnar hafi verið til þess fallnar að vekja ótta um líf, heilbrigði og velferð barnanna.
Dóttirin kærði föður sinn á lögreglustöð þann 18. apríl árið 2018 fyrir líkamsárás og heimilisofbeldi. Sagðist hún hafa búið við mikið ofbeldi af hálfu föður síns á heimilinu lengi. Foreldrar hennar eru báðir innflytjendur.
Sagðist hún í skýrslu ekki hafa tölu á því hversu oft hún hefði orðið fyrir ofbeldi. Hún muni eftir því að hann hafi slegið hana utan undir þegar hún var fjögurra ára gömul eftir að hún missti glas.
Einnig sagði hún að faðir sinn hefði beitt alla fjölskylduna miklu andlegu ofbeldi. Meðal annars að hann hefði sakað móður þeirra um ótryggð fyrir framan hana og tvo yngri bræður hennar. Í eitt skipti hafi hann slegið bróður hennar utan undir til að fá hann til að skýra frá að hann hafi séð mann fara frá heimilinu.
Ofbeldisbrotið sem faðirinn var dæmdur fyrir átti sér stað þegar fjölskyldan var nýflutt til Íslands. Sagðist hún hafa grátið og verið leið yfir því að flytja til landsins. Þegar móðirin fór út þá réðst faðir hennar á hana eins og áður var lýst.
