Forseti Suður-Kóreu, Yoon Suk Yeol, hefur óvænt lýst yfir herlögum. Hann sakar stærsta stjórnarandstöðuflokk landsins um að vera vilhallur Norður-Kóreu og hafa gerst sekur um aðgerðir gegn hagsmunum ríkisins.

Herlögin væru til að vernda frjálslynda Suður-Kóreu frá herliði kommúnistanna í Norður-Kóreu og til að koma í veg fyrir aðför að ríkisvaldinu.

Forsetinn segir að hann ætli að endurbyggja frjálst lýðræðissamfélag með herlögunum. Al Jazeera greinir frá því að síðan Yoon tók við embætti árið 2022 hafi hann átt erfitt með að koma stefnumálum sínum í gegn þar sem stjórnarandstaðan er með meirihluta á þinginu. Forsetinn segir nú að stjórnarandstaðan haldi ríkisstjórninni í gíslingu með því að beita sér gegn fjárveitingum í nauðsynleg verkefni, svo sem baráttuna gegn fíkniefnum og til að efla löggæslu. Hann segir að stjórnarandstaðan geri þetta Norður-Kóreu til hagsbóta.

Flokkur Yoon, People Power Party, hefur undanfarið tekist á við stjórnarandstöðuna, Demókrataflokkinn, yfir fjárlögum næsta árs. Eins hefur stjórnarandstaðan kallað eftir því að hlutlausir aðilar verði fengnir til að rannsaka ýmsa skandala sem hafa komið upp í stjórnartíð Yoon, sem varða meðal annars eiginkonu hans og aðila í æðstu embættum ríkisins. Demókrataflokkurinn hefur nú, að sögn AP fréttastofunnar, boðað til neyðarfundar vegna yfirlýsingar forsetans.

BBC greindi frá því rétt í þessu að Demókrataflokkurinn telur að herlögin brjóti gegn stjórnarskrá landsins og að hann muni beita sér gegn því að lögin taki gildi. Það sem á óvart kemur er að formaður People Power Party, flokks forsetans, hefur líka lýst herlögin ólögmæt og heitið því að beita sér gegn þeim.

Heimildir: CNN, Al Jazeera, AP News, BBC

Fréttin hefur verið uppfærð