Trang Ninh Tran, eigandi snyrtistofunnar Anna Nail & Spa, Grensásvegi 16, varar við innbrotsþjófi í hverfinu. Mörg fyrirtæki eru við götuna en einnig íbúðahúsnæði. Hún greinir frá málinu í FB-hópnum hjóladót og segir: „Hann reyndi að fela andlit sitt.“
Brotist var inn í snyrtistofuna fyrir þremur dögum. Útidyrahurð var skemmd en ekki fleiri skemmdarverk unnin. Trang segir í samtali við DV að þjófurinn hafi haft á brott með sér eitthvað á annað þúsund krónur í smámynt. Vanalega skilji hún ekki fjármuni eftir á staðnum.
„Ég hafði gleymt airpods á staðnum en hann tók líklega ekki eftir þeim,“ segir Trang.
Aðspurð segir Trang að stofan hennar sé opin í dag. Engu að síður er útidyrahurðin enn skemmd eftir þjófinn.
Hún segist hafa tilkynnt innbrotið til lögreglu en segist ekki vita hvernig rannsókn málsins stendur. Hún kom myndefni úr eftlilistmyndavélum á staðnum til lögreglu.
„Lögreglan hefur ekki svarað mér, ég veit ekki hvort þeir munu gera eitthvað í þessu,“ segir Trang.
Af atferli mannsins eins og það birtist í upptökum úr eftirlitsmyndavélunum ræður Trang að hér hafi vanur maður verið að verki. „Ég held hann hafi stolið oft áður því hann var mjög fljótur og sóðaði ekki út. Ég held líka að hann hafi kannað aðstæður því hann vissi af eftirlitsmyndavélunum og reyndi að fela andlit sitt.“
