Sólveig Anna Jónsdóttir, formaður Eflingar, biður fólk að hafa í huga að það sé raunveruleiki margra barna í dag að þau þurfa að fara svöng að sofa út af fátækt foreldra. Þetta geti haft alvarlegar afleiðingar á líf þeirra og það sé á ábyrgð samfélagsins að bregðast við.

Hún skrifar á Facebook: „Alvöru börn í raunheimum sofna svöng vegna fátæktar. Þetta er ekki 20 ára gamalt röfl af netinu heldur staðreynd úr samtíma okkar. Þessi börn eru fórnarlömb efnahagslegs ofbeldis. Afleiðingarnar geta verið mjög alvarlegar og haft áhrif á allt þeirra líf. Það er á ábyrgð okkar að uppræta þessa samfélagslegu skömm. Getum við staðið saman og gert það? Eða erum við, fullorðna fólkið, of upptekin við að velta okkur uppúr gömlum glæpum til að geta barist gegn eitrun misskiptingar og stéttskiptingar sem skemmir líf barna og unglinga nákvæmlega núna, allt í kringum okkur?“

Sólveig deilir skjáskoti af ummælum Sönnu Magdalenu Mörtudóttur, leiðtoga Sósíalista flokksins, úr Facebook-hóp flokksins. Þar bendir Sanna á að 18% barna í 4. bekk hafi farið svöng að sofa þar sem ekki er til matur heima hjá þeim. Sanna sagði:

„18% barna í 4. bekk greina frá því að hafa farið svöng að sofa vegna þess að það var ekki til matur heima. Þetta er ekki í lagi og þessu þarf að breyta. Börn ættu ekki að fara svöng að sofa vegna skorts. Það ætti enginn að fara svangur að sofavegna skorts.“