Sjö létust þegar snekkjan sökk, þar á meðal breski milljarðamæringurinn Mike Lynch. Lík hans og fimm annarra voru sótt úr flaki skipsins í gær en áður hafði lík kokksins um borð fundist. Enn á eftir að finna eitt lík en það er lík átján ára gamallar dóttur Mike.
Snekkjan var smíðuð árið 2008 og segir Costantino að röð mistaka hafi leitt til þess að snekkjan, sem átti að vera ósökkvanleg, sökk að morgni mánudags. Costantino segir að fyrstu mistökin hafi verið þau að búa snekkjuna ekki undir það mikla óveður sem búið var að spá.
Vitni segir að það hafi tekið snekkjuna aðeins um þrjár til fimm mínútur að sökkva og höfðu farþegar um borð afar lítinn tíma til að koma sér út. Alls voru 22 um borð og komust 15 um borð í björgunarbát.
Costantino segir við Reuters að skipstjórnendur hafi gert röð „ólýsanlegra og ófyrirgefanlegra“ mistaka þegar snekkjan sökk. Hann fór ekki nánar ofan í það hvað skipstjórnendur hefðu getað gert öðruvísi til að koma í veg fyrir slysið en Costantino segir að engu að síður sé um að ræða saknæm mistök.
