Kamala Harris varaforseti Bandaríkjanna og frambjóðandi Demókrata í forsetakosningunum í nóvember þykir hafa farið vel af stað í kosningabaráttunni og hefur unnið upp það forskot sem Donald Trump frambjóðandi Repúblikana hafði á Joe Biden forseta, áður en hann dró sig í hlé, í skoðanakönnunum. Hún hefur nú fengið stuðning úr nokkuð óvæntri átt en á stærstu ráðstefnu tölvuhakkara í heimi, DEF CON, sem fram fór í gær var haldinn sérstakur viðburður þar sem um 15o hakkarar komu saman og lýstu yfir stuðningi við framboð Harris og þar að auki var fé safnað til styrktar kosningabaráttu hennar.

DEF CON og viðburðurinn, sem fékk heitið Hakkarar fyrir Harris, fóru fram í Las Vegas. Tveir fyrrum embættismenn Biden-stjórnarinnar á sviði netöryggismála, Kemba Walden og Jake Braun, stóðu fyrir viðburðinum en þeir minntu viðstadda á að meðan Harris var öldungardeildarþingmaður hafi fáir þingmenn þeirrar deildar beitt sér meira á sviði netöryggismála. Alls var safnað áheitum upp á 150.000 dollara (20,7 milljónir íslenskra króna.

Walden segir að á síðasta ári hafi hópi tölvuhakkara verið boðið í Hvíta húsið en það hafi verið liður í aðgerðum Biden-stjórnarinnar í netöryggismálum. Hún fullyrðir að þetta samfélag hakkara sé spennt fyrir framboði Kamala Harris en sé almennt ekkert sérstaklega áhugasamt um stjórnmál.

Aldrei hefur svo miklu fé verið safnað fyrir forsetaframbjóðanda á DEF CON.

Það er NBC sem fjallar um þetta mál en í umfjölluninni kemur fram að þessi stuðningur hakkara við Harris standi andspænis stuðningi rafmyntageirans við Donald Trump og hans framboð. Trump hafði áður gagnrýnt rafmyntir en sneri afstöðu sinni við í ræðu á stærstu Bitcoin-ráðstefnu heims sem fram fór í síðasta mánuði að viðstöddum mörgum áhrifamiklum aðilum í Repúblikanaflokknum og áhrifamönnum í hreyfingu bandarískra íhaldsmanna.