Það er ekki alltaf ánægjan ein að sitja í flugvél sem mörg börn eru í. Þau eiga það til að sparka í sætin fyrir framan sig (auðvitað er það foreldravandamál því það er lágmarks kurteisi að foreldrar sjái til þess að börn þeirra hegði sér ekki svona), þau gráta, eru óvær og trufla stundum á ýmsan hátt. En það er sem betur fer ekki oft sem barn veldur því að flugmenn neyðist til að öryggislenda flugvél.

Það gerðist þó í síðustu viku þegar flugmenn vélar frá Ryanair neyddust til að öryggislenda í Þýskalandi þegar vélin var á leið frá Lundúnum til Ítalíu.

Ástæðan var að níu ára drengur sullaði tei yfir sig. Það var sjóðandi heitt og hlaut drengurinn nokkur þriðja stigs brunasár að mati læknis sem var um borð í vélinni.

Þótti ekki annað þorandi en að öryggislenda til að koma drengnum á sjúkrahús sem fyrst. Mirror segir að því hafi verið lent á þýskum flugvelli þar sem sjúkraþyrla beið til að flytja drenginn beint á sjúkrahús.

Rannsókn lögreglunnar leiddi í ljós að það var drengnum einum að kenna að teið sullaðist yfir hann.