Njáll Trausti Friðbertsson, þingmaður Sjálfstæðisflokksins í Norðausturkjördæmi, kallar eftir því að Samgöngustofa grípi inn í þá stöðu sem komin er upp á Reykjavíkurflugvelli.

Greint var frá því í fréttum RÚV í morgun að blindflug yfir Öskjuhlíð að braut 31 á Reykjavíkurflugvelli sé nú óheimilt vegna þess hversu há trén í Öskjuhlíð eru orðin. Er aðeins sjónflug til lendingar nú leyfilegt.

„Hreint alveg ótrúleg staða sem hér er komin upp. Nú þarf Samgöngustofa að bregðast hið fyrsta við og grípa inn í og hefði átt að vera búin að því fyrir löngu,“ segir Njáll í færslu á Facebook-síðu sinni en hann hefur látið sig málið varða undanfarin misseri og kallað eftir því að trén verði felld.

Ekki eru allir fylgjandi því að trén verði felld enda ljóst að ásýnd Öskjuhlíðar muni breytast töluvert verði 2.900 tré felld eins og Isavia hefur farið fram á. Borgin hefur verið treg til þess.

Í svari Samgöngustofu við fyrirspurn RÚV kemur fram að stofnunin hafi heimild til að bregðast við byrjuðum eða yfirvofandi vanda vegna flugöryggis ef vandinn er alvarlegur og kallar á tafarlausir aðgerðir. Mun Samgöngustofa vera að íhuga slíkar aðgerðir.