Í færslunni kemur fram að ekki sé talið að andlátið hafi borið að með saknæmum hætti. Páll Winkel fangelsismálastjóri staðfesti andlátið í samtali við Vísi.
„Aðstæður mannsins voru með þeim hætti að Afstaða telur rétt að greina í aðalatriðum frá þeim til þess að stjórnvöld vakni af værum blundi og geri eitthvað í fangelsismálum, ekki síst með tilliti til geðheilbrigðis þess fólks sem sætir frelsissviptingu,“ segir í færslunni og tekið fram að umræddur maður hafi lokið afplánun fangelsisdóms að því marki að hann var á áfangaheimili í reynslulausnarferli. Meginregla um skilyrði til reynslulausnar er að viðkomandi brjóti ekki af sér á tímabilinu.
„Þar vandast málið því svo virðist sem oftar en ekki þurfi eingöngu ásökun til þess að reynslulausn sé rofin og viðkomandi er færður aftur til afplánunar. Það að vera sviptur frelsi með þeim hætti, án dóms eða yfirleitt sönnunarfærslu, er gríðarlega þungbært og ætti fólk í þeirri stöðu að vera undir eftirliti sérfræðinga í geðheilbrigði og sálgæslu.“
Í færslu Afstöðu kemur fram að félagið hvetji til þess að fyrirkomulagið í kringum tilvik sem þessi verði skoðað í grunninn og úrbætur kynntar sem fyrst. Ekki gangi að fólk á reynslulausn njóti takmarkaðri réttinda en aðrir sem um frjálst höfuð strjúka.
„Afstaða mun taka málið beint upp við dómsmálaráðherra en hvetur félagsmálaráðherra og heilbrigðisráðherra að skoða jafnframt hvað hægt sé að gera til að ekki tapist fleiri líf með þessum hætti. Þá verða önnur sveitarfélög en Reykjavík að koma að borðinu því það er óásættanlegt að borgin þurfi ein að styðja við jaðarsetta hópa. Þau vita sem skömmina eiga og ættu sjá sóma sinn í því að eiga frumkvæði að samtali um þessi málefni. Hugur stjórnarmanna Afstöðu er hjá aðstandendum hins látna sem og hjá samföngum og fangavörðum.“
