Í dagbók lögreglunnar á höfuðborgarsvæðinu í gærmorgun kom fram að tíu ökumenn hefðu verið sektaðir fyrir að vera á nagladekkjum, en óheimilt er að vera á slíkum dekkjum frá 15. apríl til 1. nóvember.
Í skeyti sem lögregla birti á Facebook-síðu sinni í hádeginu í dag bendir lögregla á að tími nagladekkja sé liðinn og þeir sem enn eru með slíkan útbúnað þurfi að fara að skipta yfir á dekk sem hæfa betur auðum götum.
„Alltaf eru einhverjir sem hyggja á langferðir, t.d. norður í land eða Vestfirði – en þar ríkir enn vetrarfærð og þar sem landið er jú ein heild, er ekki hægt að fara að sekta fyrr en sumarfærð er komin hjá okkur öllum. Við viljum því byrja á að ýta við þeim sem enn eru á negldum börðum að skipta sem allra fyrst en í upphafi maí verður endurskoðað og væntanlega byrjað að sekta úr því.“
Í athugasemdum undir færslunni benti einn á að samt hafi verið byrjað að sekta á miðvikudag. Því svaraði lögregla svona:
„Rétt er það að nokkrir ökumenn fengu sektir um helgina – en þær verða felldar niður þar sem sama verður yfir alla að ganga. Því miður voru skilaboð hér innanhúss ekki nægjanlega skýr og því varð úr sá leiði misskilningur og nokkrir ökumenn fengu sektir. Það verður lagfært okkar megin. Vegna þess að vetrarfærð ríkir enn á hluta landsins er ekki hægt að byrja að sekta, en þó gerum við það um leið og það breytist.“
