Ben White er Englendingum til skammar að sögn Jamie O’Hara sem spilaði um tíma sem leikmaður Tottenham.

White ákvað nýlega að hafna því að spila með enska landsliðinu í núverandi verkefni en hann hafði ekki áhuga á að sitja á bekknum í liðinu.

O’Hara gagnrýnir þessa ákvörðun White harðlega en sá síðarnefndi spilar með enska stórliðinu Arsenal.

White er 26 ára gamall en hann hefur hingað til spilað fjóra landsleiki fyrir England og kom sá síðasti árið 2022.

,,Það eru fáir leikmenn sem fá það tækifæri að spila fyrir sitt landslið. Að Ben White ákveði að hafna þessu boði því hann vill ekki sitja á bekknum eða hann hafi ekki áhuga á að horfa á fótbolta?“ sagði O’Hara.

,,Fyrirgefðu mér en þú ert í raun bara til skammar. Vitiði hvað það eru margir leikmenn þarna úti sem myndu gefa handlegg fyrir það eina að sitja á bekknum fyrir England eða spila fyrir þjóðina?“