Jón Norðfjörð segir að honum hafi verið brugðið þegar hann sá álagningarseðil 2024 frá Suðurnesjabæ þar sem hann er búsettur. Jón skrifar grein um málið í Morgunblaðið í dag og segir að það hljóti að vekja athygli þegar fast­eigna­skatt­ur hækk­ar um 26% á milli ára án nokk­urs rök­stuðnings eða skýr­inga.

Jón, sem er fyrrverandi fram­kvæmda­stjóri Kölku sorpeyðing­ar­stöðvar, bendir á að aðilar vinnu­markaðar­ins hafi í yf­ir­stand­andi samn­ingaviðræðum ít­rekað lagt fram ósk­ir um að ríki og sveit­ar­fé­lög tak­marki mjög hækk­an­ir ým­issa skatta og gjalda. Mark­mið kjara­samn­inga gangi meðal ann­ars út á að stuðla að lækk­un verðbólgu og vaxta sem víða séu að sliga heim­ili fjár­hags­lega. Til að það mark­mið ná­ist sé mjög brýnt að halda niðri öll­um skött­um og verðlagi. Bendir hann á að til séu sveit­ar­fé­lög sem hunsi þessi til­mæli á meðan sum­ar versl­an­ir, svo sem BYKO, IKEA og fleiri, hafi svarað kallinu og jafn­vel boðað verðlækk­an­ir næstu mánuði.

Man ekki eftir öðru eins

„Þegar ég skoðaði álagn­ing­ar­seðil 2024 frá Suður­nesja­bæ, þar sem ég bý, var mér brugðið og mér datt helst í hug að bæj­ar­stjórn­in hefði verið meðvit­und­ar­laus um ákall aðila vinnu­markaðar­ins um hóf­leg­ar hækk­an­ir gjalda. Fast­eigna­skatt­ur á mína fast­eign hafði hækkað um rúm­lega 26% frá ár­inu 2023 og sorp­gjöld um tæp 32%. Ég man ekki eft­ir að hafa séð svona mikla pró­sentu­hækk­un fast­eigna­gjalda hjá mér frá því að ég flutti inn í húsið mitt árið 1967,“ segir Jón í grein sinni.

Hann nefnir að álagn­ing fast­eigna­skatts taki mið af fast­eigna­mati sem hafi verið breyti­legt frá ári til árs, yf­ir­leitt til hækk­un­ar.

„Sem dæmi hækkaði fast­eigna­mat í Suður­nesja­bæ næst mest á öllu land­inu árið 2019, eða um 17,7%. Þegar hækk­an­ir á fast­eigna­mati eru mikl­ar þarf bæj­ar­stjórn að gæta þess að hlut­fall álagn­ing­ar lækki á móti. Það er sann­girn­is­mál að koma í veg fyr­ir öfga­full­ar og ótíma­bær­ar hækk­an­ir,“ segir hann.

Vill fá útskýringar og rökstuðning

Jón birtir með grein sinni yfirlit sem tekur mið af gjöldum sem lögð hafa verið á fasteign hans en á því má sjá þróun fasteignagjalda í Suðurnesjabæ frá árinu 2018 þegar Sandgerði og Garður sameinuðust til og með árinu 2024. Þá má sjá á yfirlitinu breytingu milli áranna 2023 og 2024.

„Suður­nesja­bær er tekju­hæsta sveit­ar­fé­lagið á Suður­nesj­um á hvern íbúa árið 2021 sam­kvæmt ár­bók sveit­ar­fé­laga. Þegar skoðuð eru 20 fjöl­menn­ustu sveit­ar­fé­lög lands­ins er Suður­nesja­bær fimmta tekju­hæsta sveit­ar­fé­lagið á hvern íbúa,“ segir hann.

Jón fer svo svo yfir fjárútlát Suðurnesjabæjar og bendir á að hagræðing sameiningar Sandgerðis og Garðs virðist ekki hafa skilað sér nægilega vel hvað varðar launa- og starfsmannakostnað. Segir hann að eðlilegt sé, miðað við aðstæður, hvers vegna bæjarstjórn Suðurnesjabæjar vill ekki vera þátttakandi í því að stuðla að lækkun verðbólgu og vaxta.

„Ég vil hvetja bæj­ar­stjórn til að koma með út­skýr­ing­ar og ít­ar­leg­an rök­stuðning til okk­ar bæj­ar­búa fyr­ir þess­um miklu hækk­un­um.“