Réttarhöldin fara fram í þýsku borginni Braunschweig og hefur fjöldi blaðamanna, meðal annars frá Bretlandi, boðað komu sína. Frá þessu skýrir þýska vefritið Focus.
Þetta er í fyrsta sinn sem Christian kemur fyrir sjónir almennings, ef svo má segja, frá því að hann var opinberaður árið 2020 sem hinn grunaði í hvarfi Madeleine í Portúgal fyrir 17 árum.
Christian þessi situr þegar í fangelsi vegna nauðgunar sem hann framdi á Algarve árið 2005, en Madeleine var einmitt stödd í sumarleyfi með fjölskyldu sinni á sama svæði þegar hún hvarf.
Brotin sem hann er nú ákærður fyrir eru sögð hafa átt sér stað í Portúgal á árunum 2000 til 2017 og komust upp þegar augu lögreglu fóru að beinast að honum í tengslum við rannsóknina á hvarfi Madeleine. Er jafnvel vonast til þess að einhverjar upplýsingar um Madeleine kunni að koma fram í yfirvofandi réttarhöldum.
Saksóknarar í Þýskalandi blésu til blaðamannafundar árið 2020 þar sem fram kom að Christian væri grunaður um að hafa numið Madeleine á brott og gengið væri út frá því að hún hefði verið myrt. Enn sem komið er hefur Madeleine ekki fundist og Christian ekki verið ákærður fyrir aðild að hvarfi hennar. Það kann þó að breytast og heldur lögreglan í þá von að það muni takast fyrr en síðar.
Í umfjöllun Focus kemur fram að tveir Þjóðverjar muni bera vitni í þeim anga málsins sem snýr að tveimur nauðgunum sem áttu sér stað á Algarve. Er vonast til þess að þessi vitnisburður þeirra geti hugsanlega varpað frekara ljósi á hvarf Madeleine.
Annað þessara vitna er fyrrverandi unnusta Christians, Helge B. Hún hefur sagt að Christian hafi opnað sig um hvarf Madeleine árið 2008 og lýst því að hún hafi „ekkert öskrað“.
Christian var búsettur á Algarve á árunum 1995 til 2010 þar sem hann vann við hin ýmsu störf en stundaði einnig innbrot og þjófnaði.
