Skiptum er lokið í þrotahúi Húrra en þar var um tímaboðið upp lifandi tónlist við góðan orðstír, að Tryggvagötu 22. Gjaldþrotið telst lítið, engar eignir fundust í búinu en lýstar kröfur eru rétt rúmlega 23 milljónir króna.

Þorsteinn Stephensen, eigandi staðarins, segir í samtali við DV að rekstrinum hafi einfaldlega verið hætt á sínum tíma: „Rekstrinum var bara hætt af því að það voru ekki forsendur fyrir honum.“

Í viðtali við Vísir.is síðasta sumar sagði Þorsteinn húsaleiguna vera of háa. Sagðist hann óttast að Reykjavík stefndi hraðbyri að því að verða borg þar sem tónleikastaðir geti ekki þrifist.

Í húsnæðinu að Tryggvagötu 22 er nú rekinn raftónlistarklúbburinn Radar og óskar Þorsteinn rekstraraðilunum velgengni:

„Nú er ungt fólk að reka þarna raftónlistarklúbb og ég virkilega vona að það gangi vel hjá þeim. Allir á Radar!“