Þorvaldur Þórðarson, prófessor í eldfjallafræði við Háskóla Íslands, telur hugsanlegt að kvika geti verið byrjuð að safnast saman á miklu dýpi í jarðskorpunni undir Húsfellsbruna sem er víðáttumikið hraun á milli Bláfjalla og Heiðmerkur. Í síðustu goshrinu á Reykjanesskaga var Húsfellsbruni það hraun sem rann næst Reykjavík.

Þetta kemur fram í Morgunblaðinu í dag. Haft er eftir Þorvaldi að skjálftahrina á þessu svæði á síðustu dögum sé merki um að eldstöðvakerfið sem er kennt við Brennisteinsfjöll hafi virkjast. Hann sagði hugsanlegt að skjálftarnir að undanförnu séu tilkomnir vegna spennuuppbyggingar neðst í jarðskorpunni en einnig geti þeir verið merki um kvikusöfnun á skilum deigu og stökku skorpunnar þarna fyrir neðan.

Hann sagði ekki útilokað að hraun frá þessu svæði renni nærri Reykjavík og jafnvel enn lengra en í síðustu goshrinu þar. Hann sagðist telja mjög mikilvægt að ráðast af alvöru í fyrirbyggjandi aðgerðir og áætlanir. „Og það þýðir ekkert að setja það á sem eitthvert aukaverkefni,“ sagði hann.

Hann benti á að þegar það gaus síðast svona norðarlega á Brennisteinsfjallareininni hafi hraun runnið næstum því út í sjó við Straumsvík.