Rússar gætu ráðist á NATO innan fimm ára að sögn Boris Pistorius, varnarmálaráðherra Þýskalands. NATO virðist vera að undirbúa sig undir stríð, eða í það minnsta að sýna Rússum mátt sinn, því nú verður efnt til stærstu æfingar bandalagsins áratugum saman. 90.000 hermenn taka þátt í henni.

Í samtali við Der Tagesspiegel sagði Pistorius að það sé mat sérfræðinga að Rússar gætu ráðist á NATO á næstu fimm til átta árum. „Við heyrum hótanir frá Kreml daglega, svo við verðum að reikna með að Pútín ráðist hugsanlega á NATO einhvern daginn,“ sagði hann.

Hann sagði það sé ólíklegt að það gerist núna en hafa verði í huga að við stöndum frammi fyrir hernaðarógn sem hefur ekki sést í Evrópu í 30 ár: „Við sjáum þetta í innrás Rússa í Úkraínu. Við heyrum hótanir frá Kreml næstum daglega, nú síðast gegn vinum okkar í Eystrasaltslöndunum.“

Pistorius setti þessa aðvörun sína fram sama dag og Rob Bauer, aðmíráll og formaður hermálanefndar NATO, hvatti fólk til að vera undir átök búið, átök sem munu breyta lífi þess á afgerandi hátt.

„Við verðum að átta okkur á að það er ekki gefið að friður ríki. Þess vegna erum við (herir NATO, innsk. blaðamanns) að undirbúa okkur undir átök við Rússa,“ sagði hann meðal annars.

Næstu mánuði mun heræfingin Steadfast Defender 24 standa yfir víða í Evrópu. 90.000 hermenn taka þátt í henni. Markmiðið með henni er að sýna að bandalagið geti varið yfirráðasvæði sitt allt að rússnesku landamærunum.