Eldur logar í íbúðarhúsi í Efrahópi í Grindavík, en hraunstraumur rennur meðfram húsinu í götuna. Húsið er í byggingu og hefur ekki verið búið í því. Skammt frá eru önnur íbúðarhús sem búið hefur verið í.

Aukafréttatími var á RÚV kl. 14.30 og mátti sjá hraunstrauminn kveikja í húsinu í beinni útsendingu. 

Benedikt Halldórsson, fagstjóri jarðskjálftavár á Veðurstofu Íslands, segir hús ekki hönnuð til að standa af sér hraunrennsli.

„Það fer mikið eftir hæð hraunstraumsins en það stenst ekkert þessa áraun, hús eru ekki hönnuð til þess að standa svona af sér. Það má búast við að veggir gefi eftir út af álaginu og hitinn í hrauninu er slíkur að það brennur allt sem á vegi þess verður.“

Skömmu síðar náði hraunstraumurinn svo að húsi handan götunnar sem stendur nú einnig í ljósum logum.