Bláa lónið opnar að nýju, sunnudaginn 17. desember kl. 11. Í tilkynningu á vef fyrirtækisins kemur fram að opnunartími verði þó öllu styttri en vanalega, en opið verður frá kl. 11-20 alla daga vikunnar.
Opnunin nær til Bláa Lónsins, veitingasölunnar Blue Café, veitingastaðarins Lava, heilsulindarinnar Retreat Spa og Spa veitingastaðarins. Hótelin Silica og Retreat og veitingastaðurinn Moss verða lokuð til kl. 7.00 þann 21. desember og verður staðan þá endurmetin.
Bláa lónið hefur verið lokað frá 9. nóvember, eða degi áður en Grindavík var rýmd og tæplega 4000 íbúar þurftu að finna sér annað samastað. Staða íbúa er misjöfn rúmum mánuði eftir rýmingu, margir komnir með fastan samastað, aðrir ekki.
Í tilkynningunni segir að opnunin sé framkvæmd í fullu samráði við yfirvöld sem Bláa Lónið hefur verið í nánum samskiptum við vegna atburða síðustu vikna. Þrátt fyrir atburði síðustu vikna sé staðan á húsnæði lónsins góð og innviðir í góðu ástandi. Skemmdir á húsakosti eru litlar og felast fyrst og fremst í tilfærslu hluta og innanstokksmuna.
Tekið er fram að framkvæmdir eru yfirstandandi við starfsstöðvar lónsins vegna uppbyggingar varnargarða. Einnig er aðeins rútum leyfilegt að koma að svæðinu.
„Við erum afar ánægð með að geta opnað starfsstöðvar okkar að nýju og hlökkum til að taka hlýlega á móti þér og þínum í Svartsengi.“
