Breskur ellilífeyrisþegi er í vanda staddur eftir að hafa beitt rafknúnu farartæki sínu eins og vopni. Um er að ræða rafknúna skutlu eins og eldra fólk, sem á erfitt með gang, notar gjarnan til að fara ferða sinna. Hafa farartæki af þessu tagi oft verið kölluð ellinöðrur.

Mirror greinir frá atvikinu. Það átti sér stað í bænum Bideford í suðvesturhluta Englands. Ellilífeyrisþeginn, sem er karlmaður, var ósáttur við að maður nokkur hafði keypt síðasta bakkelsið sem til var í bakaríi í bænum. Rifrildi braust út á milli mannanna og skipti engum togum að ellilífeyrisþeginn ók á ellinöðrunni á manninn með þeim afleiðingum að hann féll til jarðar.

Ellilífseyrisþeginn reifst við fleira fólk á staðnum, áður en hann greip til þess að aka á manninn, og vitni að atvikinu ákvað að taka þetta hóprifrildi upp á myndband með farsíma sínum. Vitnið náði þar af leiðandi myndbandi af ákeyrslunni.

Á myndbandinu má sjá manninn keyra ellinöðruna með annarri höndinni og halda á göngustaf sínum með hinni. Einn viðstaddra heyrist bjóða manninum aðstoð áður en hann keyrir á manninn sem keypti bakkelsið en sá endaði utan í skilti.

Lögreglan í bænum var kölluð til og tókst henni að bera kennsl á ellilífeyrisþegann. Hún lagði hald á elllinöðruna og að sögn vakti það kátínu meðal bæjarbúa þegar lögregluþjónn þurfti að fara á ellinöðrunni á lögreglustöðina. Lögreglan tilkynnti síðar á Facebook-síðu sinni að þótt hún væri vinnustaður sem byði upp á jöfn tækifæri þá stæði ekki til að stofna sérstaka lögreglusveit sem muni nota farartæki af þessu tagi.

Í sömu Facebook-færslu kom fram að vitað væri hver eigandi ellinöðrunnar er en allir aðrir aðilar málsins hafi verið af farnir af vettvangi þegar lögreglan kom þangað.

Maðurinn sem varð fyrir ellinöðrunni virðist því ekki hafa slasast að ráði en lögreglan óskar í Facebook-færslunni eftir því að hann gefi sig fram.